Aizawl Municipal Corporation (AMC) inthlanna chu nimin khan tluang taka neih niin, he thu buatsaih lai thleng hian vote zaa 60.60 a tla a ni.
AMC inthlanna neihah Thawhlehni zing dar 7 atangin mipuiin vote an thlak tan a. Hriat theih chinah tluang taka vote hi thlak niin vote thlak theih lohna polling station a awm lo.
Vote thlak theih hun chhung hi tlai dar 5 thleng ni mah se hun tiam chhunga vote thlak zawh hman lohna polling station a awm tam hle a. Polling station huam chhunga awmte chu hun tiam pelhah vote thlak chhunzawmtir an ni.
AMC inthlanah hian vote nei zawng zawng hi 2,39,985 niin he thu buatsaih a nih lai thleng hian heng zingah mi 1,45,430-in vote an thlak a. Mipa vote nei 1,10,335 an awm laiin vote thlak 65,839 an awm a. Hmeichhe vote nei 1,29,650 awmin mi 79,591-in an thlak a ni.
Tun tuma Aizawl mipuiin an aiawha khawpui enkawltu tur an thlanna hi AMC inthlan buatsaih vawi 4-na a ni a. Ward 19 awmin ward paruk hi hmeichhe tana reserve a ni a, candidate 69 an awm a. Political party lian pathum – ZPM, MNF leh Congress party ten ward zawng zawngah candidate an nei vek a. BJP-in ward 11-ah candidate an nei ve bawk.
AMC inthlanah hian local council 89 awmin, polling station 264 a awm mek a ni.
Hetih lai hian Mizoram State Election Commissioner Dr H Lalthlangliana chuan tun tum AMC inthlanah hian boruak muanawm tak hnuaiah inthlanna neih a nih thu sawiin, harsatna leh buaina lian tham engmah a awm loh thu, The Zozam Times zawhna chhangin a sawi.