April 21, 2026-a Aizwl Municipal Corporation (AMC) inthlana vote tlate chu Thawhtanni khan Aizawl Bawrhsap Pisapuia counting hall-ah chhiar a ni a. State-a rorel lai party, Zoram People’s Movement (ZPM)-in seat 17 lain sorkarna siam turin hneh takin an chak.
Vote hi zing dar 8 atanga chhiar tana ni a, harsatna leh buaina thleng awm lovin chawhnu dar 2 velah result hriat kim theih a ni a. Thlan tlinte chu thlan tlin an ni tih lantirna certificate hlan nghal zel an ni.
AMC inthlanah hian ZPM, Mizo National Front (MNF) leh Indian National Congress (INC) party ten ward 19-ah candidate an nei vek a. BJP-in ward 11-ah candidate an nei thung.
ZPM party chu ward 17-ah an chak a, an chaknate chu – Ward 1, II, III, IV, V, VI, VII, VIII, X, XI, XII, XIII, XIV, XV, XVI, XVII, XVIII te a ni a. INC-in ward pakhat, XIX an la a, MNF-in ward pakhat, IX an la bawk a. BJP-in chakna bial an nei lo.
ZPM atanga thlan tlinte hian hmeichhe ward (reserved) paruk an lak vek bakah general-ah hmeichhe pahnih an tling a. INC candidate mipa pakhat a tling a, MNF candidate hmeichhe pakhat a tling bawk.
MNF candidate thlan tlin tak, B Lalawmpuii hi term thum a tlin zawnna a ni.
Tun tum inthlana inhnehna sanna ber, Ward IV-ah ZPM candidate Vanlalhriatrengi’n amah hnaih bertu MNF candidate R Lalnunthari chu vote 2,121-in a hneh a. Inhnehna hniam ber chu Ward IX-ah B Lalawmpuii’n amah hnaih bertu, ZPM candidate Zoramchhana hi vote 118-in a hneh a ni.
Aizawl khawpui enkawltu tur corporator atan thlan tlin thar zinga naupang ber chu Ward VIII atanga ZPM candidate thlan tlin, Christina Roluahpuii Sailo niin kum 31 a ni a. A upa ber chu Ward XV atanga ZPM candidate thlan tlin, VL Zamlova niin, kum 70 mi a ni.
AMC inthlanpuiah hian vote 2,39,985 awmin vote 1,50,640 a tla a, vote tla zat hi za zelah 62.77 a ni.
Hneh taka thlan tlin tak ZPM hian seat 17 la tur hian vote an hmuh belhkhawm chu vote 71,470 niin, hei hi vote tla zat atangin zaa 47.44 a ni a. INC hian vote 30,197 hmuin vote tla zawng zawng atanga zaa 20.05 a ni a. MNF-in vote 46,131 hmuin vote tla zat atangin zaa 30.62 a ni a. BJP-in vote 880 hmuin zaa 0.58 a ni a. Vote thi leh NOTA hi zaa 1.31 a ni bawk.
- THLAN TLINTE:
ZPM :
Ward I – Vanlalhriata, Durtlang
Ward II – R Lalmawipuii, Chatlang
Ward III – Vanlalfaka, Ramhlun North
Ward IV – Vanlalhriatrengi, Ramthar
Ward V – Dr Lallawmkimi Tochhawng, Electric
Ward VI – H Lalremtluanga, Chanmari West
Ward VII – Zochhuana, Zemabawk
Ward VIII – Christina Roluahpuii Sailo, Armed Veng
Ward X – PB Lallawmzuala, Zotlang
Ward XI – Helen Rualchhingi, Luangmual
Ward XII – C Vanlalhruaii, Tuikual North
Ward XIII – Vanlalhruaia, Dawrpui Vengthar
Ward XIV – Roy Lalhriatpuia, Khatla South
Ward XV – VL Zamlova, Bungkawn
Ward XVI – R Lalawmpuii, Bethlehem Vengthlang
Ward XVII – Lalremruati Sailo, Republic Veng
Ward XVIII – K Lalrodinga, Salem Veng
MNF :
Ward IX – B Lalawmpuii, Chhinga Veng
INC :
Ward XIX – Dr Lalmalsawma Nghaka, Kulikawn