Myanmar hruaitu hlui tang mek, Aung San Suu Kyi-i chu pawn chhuak thei lova ina hren (house arrest)-a awm tura sawn a nih thu an ram sorkar chanchinbuin an tarlang.
Kum 80 mi, Nobel Peace Prize pawh dawng tawh hi kum 2021-a sipai sorkarin an paih thlak atang khan hren a ni tawh a. An khawpui, Nay Pyi Taw-a sipai lung inah a awm nia ngaih a ni.
Sipai helna hruaitu, Min Aung Hlaing-a thuchhuah chuan ‘a hremna tawrh hmabakte hahdam zawka a tawrh theih nan chenna bik ruatah dah a ni’ tih a sawi.
Myanmar-a roreltuten mipui rorelna kalhmanga an kal dan an thlak hnuah Suu Kyi-i hian kum 2015 khan thuneihna a chang tan a. Hemi hma kum tam tak chhung chu sipai rorelna hnuaiah mipui rorelna a awm theih nana beitu niin kum 15 chuang zet house arrest-in an lo tantir tawh nghe nghe.
Sorkar chanchinbute chuan uniform ha mi pahnih nena an thu lai thlalak an tichhuak.
A fapa, Kim Aris-a chuan sorkar thu puan hi a ringhlel tih sawiin a nu hi a dam tih finfiahna a neih loh thu a sawi a. Thlalak hi kum 2022-a lak a nih avangin awmze nei lo a nih thu a sawi bawk.
“A dik ka beisei a. A sawn tih finfiahna erawh ka la hmu lo,” tiin BBC a hrilh a. “Chuvangin, amah nena inbiak phalsak ka nih hma emaw, miin a dinhmun leh a awmna a finfiah hma loh chuan engmah ka ring lo vang,” a ti.
A tanna sawn a ni tih puan hma hian a hriselna leh khawsak dan engmah hriat a ni lo va, Aris-a hian December thla khan kum tam tak a nu chanchin a hre lo tih a sawi tawh.
A dan hre mite pawhin house arrest-a dah a nih chungchangah hian engmah hriattirna an dawn loh thu Reuters an hrilh.
Kum nga chuang kaltaa sipaiten mipui thlan sorkar an paih thlaa an man atang khan Suu Kyi-i hi hmuh tur a awm tawh lo va, a chin hriat a ni tawh lo.
A ukil-te pawhin kum thum chuang an hmu tawh lo va, a chhungte nen pawh kum hnih aia tam an inbe tawh lo.
Ningania a thlalak tihchhuah hmaa a thlalak hmuh hnuhnung ber chu May, 2021-a court-a a inlan tum kha a ni a, sipaiten thubuai an siamsak an ngaihtuah tan tirha mi kha a ni.
Hemi hnu atang hian kum 33 chhung tang tura hremna an pek chu vawi eng emaw zat tihtlemsak a ni tawh.
Sorkar chanchinbua an tihlan a ni thut hian sipai thuneituten a dinhmun an tihdanglamsak leh dawn hnai nia ngaihna a awm a, chhuah lailawk emaw, chhuah hlen emaw pawh a ni thei.
Sipai hotu, Min Aung Hlaing-a hian ram dangten a sorkar an kawmserh chu tihtawp a duh hle a, indona hmuna ralthuam keng eptu pawlte lakah hnehna a chan nual hnuah a inringtawk sauh bawk niin a lang.
Sipai sorkar hian kum tir lam khan inthlanpui an huaihawt bawk a, hei hi mipui sorkar din lehna tur kawng anga sawi a ni a; mahse, sipai hruaitute thovin thuneihna lian an chang.
A hun hmasa lamah khan Suu Kyi-i hi zahawm, tharum thawhna tel lova sipai sorkar dodaltu tiin Myanmar leh khawvel hmun hrang hrangah a ngainatu a ngah hle a. Kum 1991 khan Nobel Peace Prize a dawng hial nghe nghe.
Kum 2017-a Muslim Rohingya-te chunga sipaite thil tihsual chungchangah International Court of Justice-a hnam suata puhna laka Myanmar lama a tan avangin a hmaa mi tam tak ngaihsanna erawh a tlahniam ve deuh thung.