West Bengal assembly inthlan thawh hnihnaa neiha vote thlak chu buaina nasa tak nena kum 2021-a inthlan neih nen khaikhinin buaina a tlem hle laiin Election Commission chuan May 4-a inthlan result puan a nih hnuah buaina chhuak thei tur venna atan inralrinna a kalpui a, boruak muanawm tak a awm theih nan thil tih a duh a, venhimna pawh an la kalpui khauh hle.
Exit poll-in BJP-in hnehna an chang thei mai thei tih a tar lan tuk, Ningani khan khawpui ber, Kolkata-ah buaina a chhuak nghal a. Trinamool Congress hruaitute chuan khawpui chhunga party aiawhte tel lovin ballot box hawn tum nia sawiin Netaji Indoor Stadium-ah duh lohna lantir an tum a. Thuchhuah siamin party chuan he thil thleng nia sawi hi ‘khaw ên laia democracy tihhlumna’ niin an sawi a, hei hian inthlan zawha buaina a awm hlauhna a siam nghal bawk a. BJP chuan rorel lai party sawi hi a nih loh thu an sawi ve thung.
Election Commission chu tharum thawhna thleng palh hmachhawn turin a inpeih reng a. Central Armed Police Forces (CAPF) company 700, state puma vote thlak tura dahte chu an la awm chhunzawm zel a. Heng mite leh tual chhung police-ten counting centre an veng.
Election Commission headquarters-a thuneitute chuan control room kaltlangin vote tla chhiar chu a hun lai lai lain an vil (real-time monitoring) dawn a. QR code hmangin photo ID card nei chauh vote chhiarna chhungah luh phal a ni dawn.
Inthlan buaipuitute chuan tharum thawhna thlenga inhnamhnawih nia hmuhte lakah khauh taka hmalak a nih tur thu a lo sawi tawh bawk.
Kum 2021-a Bengal Assembly inthlan, Trinamool Congress-in hnehna an chan khan tharum thawhna a tam hle a. National Human Rights Commission (NHRC) chhui chiannaah chuan tharum thawhna thleng 1,900 zet a chhinchhiah a, heng zingah hian mi thah, mipat hmeichhiatna hman sual, kangmei chhuak leh intihhlum te pawh a tel.
NHRC probe panel hian state Director General of Police-in a dawnte atanga an chhutin tualthah 29, mipat hmeichhiatna lama pawngsual thubuai 12, hliam na tak tuar 391, kangmei chhuak leh tihchhiat thubuai 940 leh invau thubuai 562 ziah luh a ni a. Thubuai siamsak mi 9,304 zingah mi 1,345 chauh man an ni.
Court-in a ruat fact-finding committee hran chuan tualthah 52 leh pawngsual 11 a report a, state-a complaint 3,384 thehluh zinga 1,000 vel chuan chhanna an hmu lo tih a sawi a. Panel chuan heng thil thleng zinga 60% velah hian First Information Report (FIR) ziah luh a nih loh thu an hmuchhuak bawk.
Calcutta High Court chuan kha tih lai khan dan leh thupek kenkawhna a chhiat thu a lo sawi tawh a, tharum thawhna inzawm a nih thu a tar lang bawk.