Ruahtui a han tla deuh a, kan tui tlan ber Tlawng a nu nghal em em mai a, a enkawltu leh thawktute sawi dan phei chuan a nu satliah mai ni lovin, a nu em em a ni.
Heti taka a nut nasat avang hian tui a pump hleih theih loh a, tihfim nan hun leh tha tam tak sen a ngaih bakah, tuisem thlengin a khaihlak phah bawk.
Ruahsur lai, tui tam laia tuihnianghnar tur niawm zawk tak kha tui kan harsat phah a, tuisem a buai a, a sem hunbi a ruahmanah tui sem a theih miau loh avangin a tuartu chu mipui bawk kan ni leh thin.
Hei hi a chhan ber chu kan leivung leh bawlhhlawh paih kan fimkhur loh vang leh, a paihna hmun tur ni lova kan paih nasat vang a ni. Chhuanlam tur dang a awm lo.
Mahni tui tlan ngei pawh kan diriam leh kan sawisa duh hi chu a mak a, a lehlam zawnga ngaihtuah chuan kan chunga thleng awm reng pawh a ni a tih theih awm e.
Tlawng lui humhalh leh thenfai a tulzia hahipa sawi a, aupui a, a tifai tura thawkchhuak pawh an awm fo laiin, lo tibawlhhlawh leh leivung paih nana lo hmang duh kan awm zel hi a pawi a, a tuartu chu keimahni tho kan nih avangin inhmuhchhuah nan i hmang mawlh tawh teh ang u.
A hmun lova bawlhhlawlh leh leivung paih hremna hi a nep lo a, hetiang ti kan lo hria leh hmu a nih phei chuan thuneitute hnenah i report vat thin bawk ang u. Tui hnianghnara kan hmuh reng theih nan kan tuilakna ber Tlawng hian chhantu a ngai e.