Mizoram Larsap General Vijay Kumar Singh chuan nimin khan Serchhip district chhunga Sainik School, 14 Assam Rifles leh Shalom Special School-te a tlawh.
Chhingchhip-a Sainik School a tlawhnaah hian Brig. Puspendar Sorayan, DIG, 23 Sector Assam Rifles leh Vice Principal Lt. Col. Kartik Sood, AEC ten Larsap hi an lo hmuak a ni.
Larsap chuan Sainik School chu mi tha leh danglam bik chher chhuahna tur hmun a nih thu sawiin, Armed Force-ah lut vek lo mah se, an kalna zawn theuhah chhawr tlak leh danglamna thlentu nih tum turin zirlaite a fuih.
Larsap hian 14 Assam Rifles Headquarters, P&E Veng, Serchhip tlawh lehin, Commandant Col. Archit Goswami, SM chuan an hmalak dan a hrilhfiah a. Ex-Servicemen member, Govt. Serchhip College zirlai leh sipaite a kawm bawk.
Hemi hnu hian Shalom Special School, New Serchhip tlawhin board member leh zirlaite a kawm a. Principal A. Lalawmpuii chuan school chanchin leh enkawl dan tlangpui a sawi fiah a. Shalom Special School tana a thawh hlawk em avangin Larsap hi chawimawina thuziak cheimawi an hlan nghal bawk.