Khawvel a changkang zel a, mitin kan buai tawhin, mahni tawkah hna neuh neuh thawh tur kan nei fur tawh hlawm.
Inkohkhawm leh thiltih tur, a huhoa tih ngai chi kan nei lo thei lo a, inmamawh tawn kan nih miau avangin kan inpuih a ngai thin.
Hetih lai hian Mizote hian hming mawi lohna lian deuh kan neih thin pakhat, kan chin atana tha lo tak mai chu hun kan vawng dik lo thin hi a ni. Hei hi kan insiamthat a tul hle.
Thiltih khawmna tur reng rengah huntiam siamin, hunbi kan ruat thin a, mahse a hun taka tan theih loh leh innghahkhawm ngai leh thin hi kan nei fo mai a, sim vat a tha hle.
Hnamdang hmuhah kawng hrang hrangin kan hming a mawi chho hle tawh a, hetiang dinhmuna kan din tawh laia hun ber kan la vawngdik thei lo hi a fuh lo a, insiamthat thuai i tum ang u.
Hun hi a hlu a, daihzai taka hman thiam chuan nikhat hi rei lo tak a ni. Thusawi vak a, zawm si loh chu engmah lo mai a ni ang deuh hian, hunbi tuka a huna kan tihlawhtling thei si lo a nih chuan changkannain kan nunah hna a thawk meuh lo a ni tih a chiang hle.
Hnam changkang leh nun mawi, hnamdang laka kan hmingthan zelna turin hun vawng dik ila, hun i hmang tha ang u. Tun atanga bultan nghal theih a ni e.