Aizawl: Union Minister of State for Petroleum & Natural Gas and Tourism Suresh Gopi chuan nimin khan Kolasib tlawhin, sorkar department hrang hrang hotute a kawm.
Kolasib DC Conference Hall-ah an inkawmnaah Union Minister chuan, Kolasib district chhunga hmasawnna hna thawh mek leh dept hrang hrang hmalakna te chu concern dept hotu te zawtfiah nghal zelin, zirna lamah Kendra Vidhyalaya School Aizawl tih loh Kolasib leh Mizoram district danga a awm lo chu tha lo a tih thu sawiin, sorkarin hma la se a duh thu a sawi a, Kolasib district chhungah Kendra Vidhyalaya School din tura hma lak mek a nih thu Education department hotu ten an sawi.
Union Minister Suresh Gopi chuan literacy ziak leh chhiar thiam tamna sang tak nih hi duhtawk mai lo tur leh zirna kalphung tha neih a pawimawh tih a sawi a, an zirna hi a tha em tih an inenfiah a tul a ni tiin, inkalpawhna kawng tha a ngaih pawimawh thu a sawi bawk.
He hunah hian department hrang hrang hotu te chuan an department hna thawh mek hrang hrang te an sawifiah a, Union minister hian dept hrang hrang hotu te chu an dept enkawl leh an hnathawhna kawng hrang hrangah hma sawn theuh turin duhsakna a hlan.