Aizawl: ZPM Thalai chuan an President Jeje Lalpekhlua, MLA hovin a thawh riatna atan NH-06 Sairang leh Kawnpui inkar kawng siam mek chu Inrinni khan a hmunah an enfiah.
February 21, 2026 a kawng an enfiah tawhnaah NHIDCL, J Infratech Ltd. leh BR Goyal Ltd. ten an hnena intiamna an lo neih tawh, April leh May thla chhunga an chanpual siam zo vek tura an intiamnate an bawhzui tha niin an hmu a, furpui hmachhawn zo tura NHIDCL leh ZPM sorkar hmalaknaah ZPM Thalai-te hi an lawm tih an sawi.
ZPM Thalai President chuan kum hmasa fur nena khaikhinin hmasawnna nasa tak a awm tawh tih a sawi a. “He hmasawnna kan hmuh hi Chief Minister Pu Lalduhoma leh ZPM sorkarin chak taka a nawr vang a ni,” tiin, hna hi 80% vel thawh zawh a nih tawh thu leh, khuarel chhiatna a thleng a nih ngawt loh chuan lirthei lian tangte a awm tawh loh an beisei thu a sawi bawk.
Buichali leh Mualkhang inkar enkawltute chuan an chanpual hna an zo fel tawh a, NHIDCL-in inspection an nei tawh tih an sawi a. Buichali leh Sairang inkar enkawltute chuan May 12 atangin kawng siam (resurfacing) hna an chhunzawm dawn a, ni 15-20 chhungin zawh hman an inbeisei a ni.
ZPM Thalai chuan furpui hmachhawn zo tura NHIDCL leh sorkar hmalakna chu tha an tih thu sawiin, hna kal mek chu chawlhkar tin an vil zui reng thu an sawi a ni.