Aizawl: Tourism dept hnuaia pawl pahnih — Tourism Staff Welfare Association leh Mizoram Tourism Service Association chuan thuchhuah intawm siamin, an department (Tourism) Director ni lai, pension-a chhuak mai tawh tur R Lalrodingi, sorkarin a ruai nawn chu tha an tih thu leh an thlawp thu an puang.
Tourism dept hnuaia pawl pahnihte thuchhuah chuan, an Director chu North Eastern Council (NEC) ah hun rei tak Tourism Adviser hna lo thawk tawh a ni a, Tourism Department chuan kawng hrang hrangin nasa takin hma a sawn phahin a hlawkpui takzet tih an sawi a. Central leh State sorkarah te pawh hetiang a mibik te hi chu rawihnawn an ni fo thin thu an sawi.
Hei vang hian MTSWA leh MTSA te chuan sorkarah an Director ni lai hi re-employ anih ngei theihna turin nasa takin an ngen a, an ngenna te sorkarin ngaipawimawhin a tihhlawhtlinsak nia sawiin, “Kan officer-ten qualifying service an neih hma atana Director ni lai, Pi R. Lalrodingi, 1st May 2026 atanga re-employ tura tih a lo ni ta hi lawmawm kan tiin kan thlawp takzet a ni,” an ti.
MZP chuan sorkarin pension hun tawh tourism director a ruai nawn chu mipui leh zirlaite zah lohna ang hiala ngaiin sut leh turin an ngen tih tun hnaiah thu thar thehdarhtute hmaah an puangzar tawh a. Pension rawih nawnna hi May 14, 2026 hma ngeia sut leh turin sorkar an phut a ni.