Aizawl: C. Thuamluaia Mual, Lungleiah 2 Mizo Battalion National Cadet Corps (NCC) bul tuma buatsaih, Mizorama NCC Fest & Parasailing Camp hmasa ber chu Inrinni khan Health & Family Welfare Minister Lalrinpuii’n khuallian niin a hmanpui.
Minister hi Lunglei HPC Vice Chairman V. Malsawmtluanga, LMC Vice Chairman K. Lalrinawma leh District official-te’n an tawiawm a. 2 Mizo Bn NCC Commanding Officer Col. Sagar K. Mohanty hovin NCC Cadet-ten Guard of Honour nen zahna chibai an lo buk a ni.
Khuallian Lalrinpuii chuan Mizorama NCC Fest hmasa ber Lungleiin a thleng thei chu lawmawm a tih thu a sawi a. Mizoram sorkar chuan Viksit Bharat 2047 hlawhtlin nan hmasawnna rualkhai tak a ngaihpawimawh thu sawiin, Lungleia Mizoram State University din tura ruahmanna leh he Fest chhim lama buatsaih a ni te chu a hmahruai a nih thu a sawi.
Minister chuan, “Ram hmasawnna chu thalaite, mi retheite, hmeichhiate leh kut hna thawktuteah a innghah a. NCC hi thalaite tuai hriamna hmanraw tha tak a ni,” tiin thalaite chu ram tana mi chhenfakawm ni tura an thiamna tuai hriam zel turin a chah.
He hunah hian NCC Alumni leh thalaite tana thawh hlawk tak takte hnenah chawimawina thilpek hlan a ni a. Minister hian stall hrang hrang fang kualin, 23 Assam Rifles Pipe Band leh NCC Cadet-te hnam lam entirna a thlipui bawk.
Mizorama NCC Fest & Parasailing Camp hmasa ber hi May 5–11 chhung hian Lungleiah kalpui a ni a. North East State hrang hrang atangin NCC Cadet thahnem tak an fuan khawm a ni.