Central YMA chuan tunlai hian kumpuan hmalakna chi khat atan Aizawl khawpui lun laiah ruihhlo that lohzia an aupui mek a, man an ngah tawh thu an sawi nasa hle.
Ruihhlo kaihhnawihah hian mihring man pawh an ngah tawh a, kum chanve em pawh kan thlen hma hian ruihhlo kaihhnawihah mi 200 chuang an man tawh.
Ngaihtuah mai pawh hian a rapthlak a, kan thalaite nasa taka sawisatu kan ruihhlo hi a veiawm a, enliam mai mai chi a ni tawh lo.
Kumpuan hoin an hmalakna bakah pawh hian man loh leh khawlaia chevel hi tam tak a awm dawn chiang tih a hriat a, mutmawh hnarmawha kan neih a va hun tawh em.
Central YMA hnuaia din Central Anti Drugs Squad (CADS) batch hnihnate sawi danin chawhrualin thla khatah mi 50 chuang ruihhlo kaihhnawihah man ziah ang an ni a, man hman loh engzahnge awm ang tih chu zawhna awm thei tak a ni zui lo thei lo.
Ruihhloin min nuai na a, a kalkawng kan nih miau avangin ngawrh leh nasa zawka kan do a, a dotute thlawp zawnga ke kan pe nasat pawh a tul ta hle. Naupang zawkte hnenah pawh a that lohzia hi i sawi fo thin ang u.