Chinese foreign ministry thupuangtu chuan US President Donald Trump-a’n President Xi Jinping-a sawm angin Nilaini atanga Zirtawpni chhung hian China a tlawh dawn tih a puang.
Tun tum hi kum kua dawn chhunga US president-in China a tlawh hmasak ber tur a ni.
Trump-a’n a tlawhna hi US leh Israel leh Iran indona avanga Strait of Hormuz kharin khawvel puma energy lama harsatna a thlen leh Taiwan tela thil hrang hrang avanga ram pahnih inkara inrem lohna a awm mek lai a ni.
Pathianni khan US Principal Deputy Press Secretary Anna Kelly-i chuan Trump-a hian Nilaini tlaiah Beijing a thleng dawn tih a sawi.
Kelly-i chuan US hruaitu hian Ningani hian President Xi-a nen lawmthu sawina inkhawm leh inbiaknaah a tel dawn a, hemi hnu hian Temple of Heaven tlawhin sorkarin a lo dawngsawng dawn niin Hong Kong-a South China Morning Post chuan a tar lang.
Hruaitu pahnihte hi Zirtawpniah thingpui in dunin chawchhun an fak dun ang a, kumtawp lamah US hian Chinese hruaitu hi a mikhual ve dawn tih a sawi.
Trump-a zin hi US president-in economy sang ber pahnih inkara chhiah lak chungchangah inremna siam theih beisei lai a ni bawk.
Chinese commerce ministry thuchhuah chuan an inbiakna tur chu South Korea-a Busan-a an inbiakna leh a hmaa phone-a hruaitu pahnihten inremna an o siam tawh zula kalpui a ni dawn tih a tar lang.