Aizawl: Health Worker Lalenthangi Hnamte-in India-a nurse chawimawina sang ber, National Florence Nightingale Award chu President Droupadi Murmu hnen atangin a dawng.
May 12 hi ‘International Nurses Day’ a ni a. He ni puala Rastrapati Bhavan, New Delhi-a hun hmanah Presdent Murmu-i chuan India state hrang hrang atanga nurse hnathawk tha leh chawimawi tlak mi eng emaw zah chawimawina a hlan a. President hnen atangin Lalenthangi Hnamte, Health Worker, Tuichawng Ayush Health & Wellness Centre chuan award a dawng a. Award hian Certificate of Merit, cash award Rs. 1,00,000 leh medal a keng tel a ni.
Mizoram chhunga thawk nurse mi 17-in he chawimawina hi an dawng tawh a. Kumin a dawngtu hi 18-na a ni a. Mizoram sorkar chuan he award dawngtu apiangte hi kum 2024 atang khan citation leh cash award Rs. 50,000 a hlan thin a ni.
Lalenthangi Hnamte hi Auxiliary Nurse Midwife (ANM) niin kum 1999 atanga healthworker-ah appointment hmuin Lunglei district chhunga hmun hrang hranga health centre-ah hna thawkin tunah hian Tuichawng AHWC-ah a thawk mek a. A hnathawh chhung zawngin TB, HIV/AIDS, cancer enkawlna, rilru hriselna, kum upate enkawlna, phar screening, nu leh nau hriselna leh Covid-19 kaihhnawih hrang hrangte chu theihtawpin a thawk thin.