Ni tin inhlawhfa (daily labourers) leh a chhawrtu tur (employer)-te awlsam taka an indawr tawnna tura duan, ‘Mizoram Labour Link’ mobile app chu Nilaini khan Labour, Employment, Skill Development & Entrepreneurship (LESDE) Minister Lalnghinglova Hmar-in a tlangzarh.
LESDE Auditorium, MINECO-a tlangzarh inkhawmah minister chuan khawvel changkang zel banpha tura digital infrastructure pawimawhzia a sawi a. “Mihring thiamna tihpunna chu digital world-ah hian a awm,” tiin, he app hian inhlawhfa hnufual zawkte leh hmun kilkhawra awmte thlengin a tanpui a beisei tih a sawi.
LESDE minister chuan Mizoram Journalists’ Association (MJA) hruaitute leh chanchinbu mite chu he app hi a hmangtu tur takten an hriata an hman tangkai theih nana thehdarhpui turin a sawm a. Awareness campaign hrang hrang neih a pawimawh thu a sawi bawk.
‘Mizoram Labour Link’ mobile app-in a tum chu pawn lam mi inrawlh ngai lova hnathawktu leh a chhawrtu direct-a an indawr theih nan te, hnathawh tur zawnga hmun him lo laia hnathawktute fuankhawm ngai thin tihbo nan leh ni tin inhlawh thinten an thawh hlawh dik tak (fair wage) langtlang taka an hmuh theih nan tea duan a ni deuh ber.
He mobile application hi smartphone hmanga awlsam taka hman thei tura siam a ni a. Sorkar chuan tihchangtlun zel a tum a, hmun kilkhawa awmte tan pawha hamthatna hrang hrang hriat zung zungna hmanrua a nih beisei a ni.