Aizawl: Chief Minister Lalduhoma chuan Mizoramin sangha thar chhuah lama hmasawn an la mamawh tih sawiin tharchhuah dan (productivity) tihsan a ngaih thu a sawi.
Fisheries department bultumin Nilaini khan Dawrpui Multipurpose Hall-ah Mizorama sangha khawitute intawhkhawmna, Mizoram Fish Farmers’ Meet neih a ni. He hun hi chief minister chuan khuallian niin a telpui a, Mizoramah sangha khawi theihna ram hectare 24,000 zet an neih laiin, hectare 6,000 (25% vel) chauhah sangha dil an la neih thu sawiin, a thar chhuah zat pawh tihsan a ngaih thu a sawi.
Chief minister chuan sangha dil an la neih tlem avang te, tharchhuahte dah thatna (cold storage) an la neih that tawk loh avangte leh hectare khat atanga sangha tharchhuah zat (productivity) a la hniam avangin sangha intodelh kawngah harsatna an la tawh thu a sawi a. “Sangha dil thar kan laih belh thei rih lo a nih pawhin, kan neih chhunte thar hlawktir lamah tan kan la thei a ni,” tiin chief minister chuan sangha khawitute a fuih a. Sangha hrisel zawk neih dan te, a chaw thlengin tunlai thiamna thar ber berte hmanga sangha khawitute an inhriat thiam a pawimawh thu a sawi bawk.
Sangha tharchhuah tam lama hma an sawn theih nan sorkar chuan minister kaihhruaina hnuaiah thapui an thawh mek tih sawiin chief minister chuan, scheme hrang hrang Blue Revolution, PMMSY, leh Mizoram flagship scheme Bana Kaih (Handholding) hmangtein hma an la a. CM Special Package leh loan component hmangin sangha dil siamtu mi 240 chuang banah kaih an ni tawh a, hna thawk tha apiangte sorkarin a thawhpui zel dawn tih a sawi.
Chief minister chuan sangha thar chhuah tawhte bazar-a awlsam taka an lo hralh/dah that theih nan chain cold storage facility a tam thei ang ber neih sorkarin a tum thu a sawi a. Fisheries minister leh department mi thiamten hmalakna thar tur an buatsaih mek thu leh, a tul anga bawhzui a nih tur thu a sawi bawk.