Aizawl: PHED hotuten nimin khan Thenzawl mipuiin tui hnianghnar zawka an neih theih dan tur bakah chief minister hmalaknaa Neihloh khaw thar din tura tui lak dan turte a hmunah kalin an en dik.
PHED Chief Engineer (Zone-I) Er. Lalropuia hovin, tui lakna hmun pawimawh Vanva Tuikhuah hna thawh mek chu tlawh a ni a. Thenzawl mipui tui tlan ber a nih avangin, hna thawh dan leh leilung awm dante chu a hmunah contractor-te nen ngun takin an thlirho a. Thenzawl tana tui hnianghnar zawk a rang lama neih a nih theih nan hmalak dan tur rel a ni.
Chief Minister hmalaknaa Neihloh khaw thar din tur atan hian Tuitam lui atanga tui lak tum a ni a. PHED hotute hian a tui hna awmna ramhnuai leh khaw thar tura Reservoir (tui dahkhawmna) dahna hmun turte an en nghal a. He tui lakna hnaah hian solar energy hmanga tui pump (Solar pumping system) tum a ni a, a hmunah hian thil tul dangte ruahman nghal a ni bawk.