General Administration Department enkawl Mizoram sorkar quarters luah dilna leh pekna online hmanga kalpuina, Quarters Allotment Management System (QAMS) leh state pawna Mizoram House-te online hmanga book-na Mizoram House Online Reservation System chu nimin khan Chief Minister Lalduhoma’n a hawng.
CM Conference Hall-a inkhawmah chief minister chuan sorkar quarters luah diltuten lehkha thehluh ngai leh pension emaw, thihna emaw avanga quarters ruak singsak dante chu manual-a kalpui a nih thin avangin a enkawltu leh a diltute tan a buaithlakin hun a heh thu sawiin, “Tunah chuan internet kaltlangin awlsam takin a dil theih tawh dawn a. Chutiang bawk mipuite tana Mizoram House booking va dil buai ngai thin pawh office-a kal kher ngai lovin online-in a tih theih tawh dawn a. Aizawl pawna chengte tan phei chuan a hahdamthlak lehzual dawn a ni,” a ti.
Chief minister chuan, “Tunlai thiamna hmanga mipuite tana awlsamna siam hi kan sorkar hian a ngaipawimawh a. Uar deuh deuh a, Mizoram hi digital state-a siam hial kan duh a ni,” a ti bawk.