Aizawl: Mizoram Universal Health Care Scheme 2.0 atana inziah luh hun tawp ni thlengin chungkaw 46,228 inziak lut a. A hmang thei hi mi 2,19,353 an ni.
Kum 2025-2026 chhunga MUHCS 1.0 kalpuiah khan kum tluan inziak lut hi chhungkaw 20,213 an ni a, nikum aiin inziak lut 26,015-in an tam.
Hriat theih chinah MUHCS hi mi nuai 12 velin an hmang thei dawn nia ngaih a ni a, offline-a inziak lut leh pensioner inziak lut zat hi la hriat theih loh ni mah se, chhut danin online-a inziak lut 2,19,353 te, AB PM-JAY atanga MUHCS zawm mi 5,99,433 te, sorkar hnathawkte leh offline leh pensioner-te nen mi nuai 12 velin an hmang dawn niin ngaih a ni.
MUHCS 1.0 ah kha damlo inenkawl senso bill pek theih loh a awm lo a, bill an pe tha a ngaih a ni a, MUHCS zawmtu mi mal enkawl damdawi in te pawhin an thatpui niin hriat a ni.
MUHCS 2.0 kalpui mekah bill Rs vbc 15.69 pek chhuah a ni tawh a, hetihlai hian technical thil avangin PM-JAY zawmtu bill erawh pek rih lo a awm a, Health Department chuan heng bill te hi pek vat a nih theih nan theih tawp an chhuah tih a sawiin, sum pekchhuah kawngah harsatna an nei lo, technical thilah erawh harsatna a awm leh thin thu an sawi.