Aizawl: Union Minister of State for Consumer Affairs, Food & Public Distribution Nimuben Jayantibhai Bambhaniya chuan Prime Minister Narendra Modi hruaina hnuaiah hian mi vaibelchhia 81 laiin a thlawnin ration an dawng reng a, khawvel puma ei leh bar khamkhawp inngaihtuahsakna lian ber a nih thu sawiin, Mizoramah pawh mi tinin eikhawp hnianghnar an neih reng theih nan theihtawp an chhuah dawn tih a sawi.
Inrinni zana Supply department-in union minister puala Aijal Club-a zanriah a buatsaihah Bambhaniya chuan FCS&CA Department hmalakna hrang hrang lakah e-KYC, EPOS leh SMART PDS te hian mi tam tak a tanpui a ni, tiin an hnathawhte a fak a. Hmarchhak bialah fur ruahtui tlak nasat avanga inkalpawhna kawngpui a chhiat fo thin avangin fur thlen hmain thla thum daih ration pek lawk an nih theih nan tanpui a inhuam thu a sawi a, chutih rualin Mizoram harsatnate CAF&PD Minister Pralhad Joshi hnen thlenpui a inkawmna hun siamsak a inhuam thu a sawi bawk.
Union minister chuan Mizoram a tlawh chhan ber chu state-in harsatna a neihte zir a, a tul anga ching fel tura lo kal a nih thu a sawi.
Supply Minister B. Lalchhanzova pawhin thu sawiin Mizoram tlawha state harsatna hrang hrangte a hmun ngeia a zirchian avangin lawmthu a sawi a. Mizoram eikhawp a awm reng theih nana an tanpuina avangin sorkar laipui leh FCI-te hnenah lawmthu sawiin, sorkar laipui nena thawhdunna tha tak neih zawm zelin mi tinte chanvo tur chu a bothlau a awm lohnan tan nasa leh zuala an lak tur thu a sawi a. Mizorama food supply tihhmasawn zel nan leh mi zawng zawng tan chaw khawpkham a thlen ngei theih nan Mizoram NFSA quota tihpun sak turin union minister a ngen nghal.