Israel-in Gaza Strip-a beihpui thlaknaah hian Palestinian panga an thi a, heng zingah hian Deir el-Balah-ah pathum an tel a; Khan Younis leh Beit Lahiya-ah mi dangte an thi bawk.
Pathianni khan ram laili, Deir el-Balah-a vantlang tana ei siamna leh eina (community kitchen) beihnaa thi pathumte hi tanpui hna thawktute vek niin Al Jazeera chuan a tar lang.
He thil thleng hian Israel-in mipui chauh a tum lo tih a tilang a, Gaza-a vantlang rawngbawltu pawlte pawh a tum tih a tilang niin a tar lang bawk.
Beihna thleng chungchangah hian Hamas chuan ‘indonaa dan bawhchhiatna chiang tak a ni a, Gaza Strip-a kan mite suatna kalpui mekna hmun thar a ni’ a ni tih an sawi.
“He thil thleng hi khawvelin engmah a sawi lo leh hma a lak lohna kara khawvel pum huap kal dan leh dan zawng zawng zah lohna langsar tak, an luah theih nana mi thah an chhunzawm zel theihna tura a tichaktu a ni,” tiin ralthuam keng pawl hian thuchhuahah an tar lang.
Pathiannia Gaza-a health ministry-in an chhinchhiahna a tihchhuahah Israel-in Gaza laka October 7, 2023 atanga beihpui a thlak atang khan Palestinian 72,760 an thi tawh a, nikum October thlaa inkahhai kalpui tan atangin mi 871 an thi tawh bawk.
Israeli sipaite hian Gaza ram 60% vel an luah a, ‘yellow line’ tia an sawi hmanga ramri siamin hengte hi buffer zone tiin an luah a ni.
Pathianni khan zone-ah chuan Israeli sipaite chuan mi pakhat an that tih an sawi a, finfiahna sawi lem lovin an thah hi ralthuam keng, sipaite tana hlauhawm a nih thu an sawi.
Sipai thuchhuah chuan Hamas commander pakhat thah a nih thu a tar lang bawk a, ani hi Bahaa Baroud tia hriat a ni a. An pawl erawh chuan engmah an la sawi rih lo.