Indian Oil Corporation Limited (IOC) chuan Mizoramah petrol, diesel leh gas a tam tawk tih an sawi a, mipuite tan chiaina tur a awm rih loh thu an sawi.
Tun hnaiah sorkar laipui hotuten mipuite hnenah inrenchem tura ngenna neiin, prime minister pawhin a convoy a titlem hial a, hei hian ramchhung mipuiteah inhnialna leh chiaina a thlen deuhin a lang a, mahse IOC chuan chiaina tur a awm loh thu an sawi a ni.
Hetih lai hian khawthlang ram thenkhatah indona avanga buaina awm hian oil lakluhah harsatna thlen thei reng a ni thung a, theih ang anga oil renchem erawh mipuite chuan kan chin deuh deuh a ngai awm e.
IOC hotute chuan hlauhthawnna avanga tuialhthei chhek khawl lo turin mipuite an ngen thung a, hei hi kan zawm a, kan hriatreng pawh a tha hle. Tuialhthei chhek khawl hi a hlauhawm a, awlsam taka kangmei chhuak thei a nih avangin in lamah a nei deuhte pawhin chhek khawl loh ni thei se, IOC hotute sawi danin chiaina tur a awm lo tih hi i hrereng ang u.
Mipuite hian kan duh chuan thu kan awih thei a, kan harsatna tam zawk hi keimahni insiam chawp a awm fo thin avangin thuneitute leh a hre zawkte thu zawm mai hi i ching thar fo bawk ang u.