Aizawl: Local Administration Department Minister C. Lalsawivunga chuan nimin khan a Office Chamber-ah a bial, Aizawl South I huamchhunga tun hnaia Mizoram Engineering Service (MES) exam-a tling thar mi palite a lawmpuina hun a hmanpui. Bialtu MLA hian hlawhtlinna changte hnenah lawmpui nan laptop leh citation a hlan.
Aizawl South I MLA C. Lalsawivunga chuan Mizoram Public Service Commission (MPSC)-in competitive exam felfai leh rintlak tak a buatsaiha a bial chhung mite an tling zut zut chu hmasawnna duhawm tak a nih thu a sawi a. Tun hnaiah MCS leh MIS-a tlingte bakah, HSLC leh HSSLC exam-a top 10 thlenga tling phakte lawmpuina hun an lo hman tawh thu sawiin, tunah MES-a tling thar mi pali lai an nei leh thei chu a lawm takzet tih a sawi.
Zirna a pawimawh telh telh avangin tling tharte chu Mizoram chauh ni lo, ram tana rohlu ni phak tur leh malsawmna petu Pathian hre reng chunga ram tana thawk turin duhsakna a hlan.
Aizawl South I bial chhung atanga MES-a tling thar, Minister-in lawmpuina a hlante chu Lalchhuanawma Pachuau (Republic Hmar Veng), Phillip Vanlalfinga (Bethlehem Vengthlang), Lalthansangi (Bethlehem Vengthlang) leh Laldinsanga Hrahsel (Bethlehem Veng) te an ni.