Aizawl: Online hmanga damdawi zawrh duh lohna lantir nan Nilaini khan India ram puma damdawi zuarten lungawi lohna lantirin dawr an khar a. Mizoramah pawh zawm a ni a, nilengin damdawi dawr inhawng an awm lo.
Mizoram Chemists & Druggists Association (MCDA) chuan nimin zing khan Civil Hospital, Aizawl bulah lungawi lohna lantirin an pungkhawm a. An lungawi loh chhante chu banner kengin an lantir a ni.
All India Organization of Chemists & Druggists chuan nimin khan India ram pumah damdawi zawrhna dawr an khar a, online-a damdawi chah inkaihhruaina mumal awm lo avanga dawr khara lungawi lohna an lantir hi Mizoramah pawh damdawi zuar intelkhawm pawl, MCDA pawhin thlawpin nilengin dawr an khar a. Dawr khar hian damdawi ina damdawi zawrhna erawh a huam dawn lo thung.
Thawhlehni khan MCDA hian Aizawl Press Club-ah thu thar thehdarhtute an kawm a, an President Lalhruailiana chuan online-a damdawi zawrh hrim hrim an do lo tih a sawi a, dan leh hrai mumal awm lova online-a zawrh leh hralh chu mipuite him nana thil pawi thei a nih thu leh online-a damdawi zawrh leh hralh hi Drugs & Cosmetics Act, 1940 leh Rules 1945 dan hman lai mek hnuaiah chuan dan a kalh a nih thu a sawi.