Mizote hi zirtir nuam, thuawih thei tak kan ni a, zirtirna leh thudik leh tha hrilhtu kan awm loh thin avanga buai anga lan chang nei mai kan ni zawkin a hriat.
Mizoram sorkar chuan prime minister hnen atanga ngenna an dawn angin oil-a inrenchem nan ruahmanna hrang hrang a siam a, hei hi oil a vang thut dawn tihna lam a ni lo.
Asia khawthlang lam, oil ngah ram an buai a, indona hmuna awm an nih avangin tunhma anga oil lakluh kawngah ram hrang hrangin a hma an pha lo a, lut lo tawp erawh a ni lo tih kan hriat a tha.
Sorkar laipui chuan state tin sorkar hnenah ngenna siamin, hei hi kan ramah pawh a remchan dan ang angin kan zawm ve a ni mai a, oil vang tur lam a kawk rih lo.
Inrenchemna kalpui a nih avang hian petrol leh diesel a vang thut dawn pawh a ni lo a, mahni in lama chhekkhawl vak a tul lo a, pump tina chuhhelh taka intlar put lah thil tul a ni kher lo tih kan hriatthar a tha hle.
Mitin hian nitin inrenchem kan mamawh tawh zawk a ni a, hei hi kan vawn reng a, a theih ang anga kan inrenchem hi a tul a, tuialhthei mahni in lama chhekkhawl hi a him lo a, awlsam taka kangmei tichhuak thei a ni tih pawh kan hriatreng a tha zawk.
Tuna sorkar in inrenchemna a kalpui hi a thain, a lawmawm a, hei vang hian tumahin chuhhelh thut hun atan hmang lo ila, kan ram dinhmun a la him tawk a ni tih i hrereng zawk ang u.