Food, Civil Supplies & Consumer Affairs (FCS&CA) Minister B. Lalchhanzova’n Zuchhip khaw hmun hlui lungphun hawnna inkhawm chu khuallian niin Thawhlehni khan a hmanpui a. Aizawl Municipal Corporation (AMC) Executive Corporator Christina Roluahpuii Sailo chu khualzahawm a ni.
Khuallian chuan Zuchhip khaw chhuak thlah a nih thu sawiin thlah kal zelten an pi leh pute lu nghahna hmun hriaa roh taka an cheibawl leh an enkawl chu ropui a tih thu a sawi a. Mahni pi leh pute khaw chhuahna hmun zahpui lova hriat reng chu malsawmna dawnna a nih thu a sawi bawk.
Hemi hmunah hian ruihhlo ngaite enkawlna tur, Chhanchhuahna Home din a ni chu tha a tih thu sawiin B Lalchhanzova chuan, an inenkawl dan leh home-a awmte intodelh taka an ei tur an thawk chhuak thei chu chhinchhiahtlak a tih thu a sawi a; Zuchhip Hmun Hlui Humhalhtu Pawl hmalakna chu fakawm a tih thu sawiin duhsakna a hlan a ni.
Khualzahawm Christina Roluahpuii Sailo pawhin Zuchhip khaw chhuak AMC corporator an neih thu sawiin mipuite harsatna lakah pawh a theih ang anga lo puih a inhuam thu a sawi.
Zuchhip Hmun Hlui Humhalhtu Pawl hi kum 2019 khan din a ni a. An hmalaknain Zuchhip hmun hluia lungdawh leh thlan awmte humhalh niin kum 2020 khan Chhanchhuahna Home hi an din a ni a. Tunah hian khum 34 awmin ruihhlo ngai enkawl mek mi 32 leh rawngbawltu mi 10 an awm mek a ni.
IPRP&S minister ni bawk, B. Lalchhanzova hian Thawhtanni zan khan YMA Zuchhip Branch, Khawzawl YMA Day vawi 91-na chu Zuchhip Branch YMA Hall-ah khuallian niin a hmanpui bawk.