LPS Pro Fight-ah bantamweight champion Laldinsanga a tel dawn lo va, welterweight champion Lallawmawma’n title kalsanin weight dangah insawn a tum bawk.
Pro Fight hnuhnung ber, kum 2024 khan Dinsanga’n bantam title humhimin Omega Lalramdina a hneh a. Hnuhma tha tak hnutchhiah chhunzawmin kum 2022 atangin a zawna vawi thum a champion-na a nih bakah vawi thum a zawnin best boxer-a thlan a ni bawk.
Ramthar Veng Lunglei boxer Dinsanga hian 2022 Pro Fight atangin professional a luh chilh a; nikum khan Mizoram Police-ah lutin a inhnek tam thei lo naa November, 2025 kha a inhnek hnuhnun ber niin LPS Arena-ah Mazhar Hussain a hneh a ni.
Professional huanga a inhnek tawh vawi 13-ah chak vekin knockout hmangin tum riat hnehna a chang a. Bantam-ah India No. 1 niin khawvel pum professional inhnek chhinchhiahna boxrec rating-ah 41-na a ni mek bawk.
Professional-ah insawrbing a duh bakah boxer dangte tan kawng hawnsakna tur a nih bawk avangin Pro Fight-ah a tel dawn lo a ni.
Welter champion lai Lawmawma’n title humhim a tum lo tih a sawi chiang bawk a. Kum 2024 khan a vawi khat nan Pro Fight-ah Tuipui tlangval hi telin champion lai, Lalruatzela Hauzel hnehin a champion nghal a; September 8-a tan tur Pro Fight vawi 12-naah tel tum mah se chona thar hmachhawnin light title a chuh dawn a, welter champion kawnghren a kawl lai a kalsan ang.
Lalkhawngaiha’n light title a kawl mek a, anni hi Assan Regiment-ah tang zuiin chawlh a neih theih dan tur a la chiang lo va, title a humhim thei dawn em tih a hriat rih loh.
Venghlui tlangval hi a title kawl mek chhuhsak tumtu, Lawmawma ang bawkin kum 2024 kha Pro Fight-a a tel hmasak ber a ni a, final-ah C Lalhruaitluanga, Cherhlun hnehin a champion a ni.
Fly champion lai, Lalrinngheta’n title humhim a tum ve thung a, Tuipui tlangval hi weight hrang pahnih, bantam leh light-ah tel tawhin a hlawhtling zo lo ve ve a, kum hnih kal ta khan weight dang, fly-ah telin a vawi khat nan Pro Fight-ah a champion.
F Lalthanliana Junior chuan middle title humhum a tum bawk a; Electric Veng Lunglei boxer hian kum 2024 khan champion lai, C Lalhruaitluanga, Chawngtlai hnehin a duhthusam a tipuitling a, a hma kum, 2023 khan a vawi khat nan Pro Fight-ah telin title fight-ah Hruaia a hneh lo ve thung a ni.