Aizawl: Central YMA hnuaia Central Anti Drugs Squad (CADS), Excise & Narcotics Department leh 34th Bn. Assam Rifles-te thawkhoin, June 11 khan Tuivai lei (Unity Bridge) bulah Manipur atanga Mizoram lama ruihhlo leh ralthuam tawlh tum mi pakua an man.
Heng ruihhlo tawlhtute hi ralthuam kenga inring sa an ni tih CADS-ten hnuchhuina atanga an hriat lawk avangin, Assam Rifles leh Excise Department-te hi an pun a. June ni 11 chawhnu khan Tuivai lei panna kawngah hian lo changin, ruihhlo tawlhtute hi Bolero leh Bolero Camper motor pahnih an man ta a ni.
He operation-ah hian Heroin (No.4) hawng 61, M4 Carbine silai pakhat leh a mu pakua an man a; motor pahnih pawh an hnunsak nghal.
Ruihhlo tawlhtute zinga mi pakhat chuan Heroin hawng 69 leh silai dang pakhat nen ramhnuai lamah Manipur ram chhungah a tlanchhiatpui hman nia hriat a ni a. Man tirh hian thenkhat chu HPC duty anga insawiin dawt sawi mah se, an vai hian inthurual vek an ni tih finfiah a ni.
An mi mante hi Lalramsiem (43), Andrew (30), Lalthlankung Hmar (42), John Barnard (34), Lalchuailou (49), Joseph (19), Lalneihlim (18), Lalrinchhan (36) leh Lalmalsawm (37) te an ni a, Pherzawl District, Manipur a cheng vek nia insawi an ni.
Fimkhur thilah an mi mante hi New Vervek lamah hruai chhoh nghal niin, silai, a mu leh a kengtu hi Sakawrdai Police hnenah hlan an ni.
Heroin hawng 61, motor pahnih leh mi dang pariatte chu Excise & Narcotics Department hnenah hlan niin ND&PS Act tlawhchhanin thubuai ziahluh a ni. Thiam loh an chan chuan kum 10 atanga kum 20 thleng lung in tan leh cheng nuai 1 atanga nuai 2 thleng pawisa chawitir theih a ni.