Aizawl: Kulikawn Branch YMA chuan Zirtawpni zan khan thalaite tana khawtlang nun siam tha tura zirtirna ‘Zo nun zemawi inzirtirna leh ruihhlo do awareness’ hun an hmang. He hun hi kum 13 atanga kum 19 inkar thalaite puala buatsaih a ni.
He hun hmanpuitu, Central YMA General Secretary Prof. Malsawmliana chuan tunlai thalai tam tak rilru no leh nem zawk te, depression nei anga inngai mai thinte a tam thu sawiin, “Chumi damdawi tha ber chu rilru paukhauh a ni. Chuvangin, hlawhtling turin rilru paukhauh tak pu turin ka chah che u a ni,” tiin thalaite a chah.
Aia upa zah chungchang sawiin, “Aia upate zah leh ngaihchan hi kan pipute nun mawi, tun thlenga kan la chhawm zel a ni a. Kan pipute khan khawtlang rorelnaah leh khawtlang nun honaah aia upa te leh valupa thu an ngaichang thiam a, chutiangin naupang zawk te an duat thiam thin a ni,” tiin Mizo zia mawi leh hlu, aia upa zah thiamna vawn nun zel a pawimawh thu a sawi.
CYMA GS chuan phut let nei chunga mi dang tana inpekna hi tlawmngaihna a nih loh thu a sawi a. “Tlawmngaihnaah chuan phut let emaw lansarh emaw a tel lo a, ngawi renga mi dang tana nun mai hi a ni. Hei hian tlawmngaihna chu mi dang tana thil tha tihsak duhna a nih thu a tar lang a. Tlawmngaihnaah hian mi dang itsikna leh erna a tel lo a ni,” tiin a sawi a. Mi tinin tlawmngaihna an nunpui tlat hian khawtlangah rah tha a chhuah thin thu leh, mi dang chunga thil tha tih hian mi dang rilruah pawh tihlet ve duhna a piantir thuai thin thu a sawi bawk.