Iran chuan World Cup-a Los Angeles Stadium-a Belgium nen an inkhelh hnuah ‘hnam zawng zawng zingah remna, zahna leh inthian thatna awm rawh se’ tih thuchah an hnut chhiah.
Group G inkhel vawi hnihnaah goal awm lova an inhnehtawk hnuah kutziak lehkha hi an dressing room-ah an dah a ni.
Iran hi World Cup-a an inlan mek lai hian an ram leh Canada leh Mexico te nena thlengtu, US nen an indona tihtawp tumin inbiakna a kal mek.
Football Federation of Iran (FFIRI)-in thuchah a tihchhuahah hian, “Kum sang tam tak kal taa Persia atanga tunlai Iran changkan hnu thlengin Iran thlarau chu a nungin a nghet reng a ni,” tiin a inziak tih an tar lang.
“Los Angeles-ah hian chhuanawm takin kan lo kal a, chawimawina nen kan inel a, zahawm takin kan chhuak a ni,” an ti.
“Los Angeles, min mikhualna avangin lawmthu kan sawi e,” an ti.
“Minute 180 chhunga Iran tana an thinlung, aw leh thlarau petu Iranian zawng zawng chungah lawmthu kan sawi bawk,” an ti bawk.
“Hnam zawng zawng zingah remna, zahna leh inthian thatna awm rawh se,” an ti.
Thuchah hian Minab-a hmeichhe sikul beih a nih thu a tar lang bawk a, indona a chhuah tan nia beihnaah hian mi 168 vel an thi a ni.
Iran hian an inkhelh hmasakah New Zealand nen 2-2-in Los Angeles Stadium-ah an inhnehtawk tawh a, vawi thumna leh hnuhnung berah Egypt nen Seattle-ah Inrinni hian an khel leh dawn.
World Cup-a an inlan hi Middle East-a indona leh a kaihhnawih venhimna lam thilte nen thui tak a inkungkaiaih a, sawi pawh an hlawh hle.
An backroom staff member tam tak chu US-a luh theihna tur visa pek an ni lo va, FFIRI chuan Fifa hnenah thlenin, ‘tan lan nei lo, dik leh dan ang taka thil ti turin’ a ngen.
Hemi hnu hian Iran hian World Cup khel tura an awmhmun chu US-a Arizona atangin Mexico-a Tijuana-ah an sawn a, inel chhungin zin veivah khuahkhirhna an tuar bawk.
An inkhelh hma niah US-ah luh phalsak an ni a, an inkhelh ni vekah an chhuah leh a ngai bawk.
Hei vang hian Iran chuan New Zealand nen an inhnehtawk hnuah head coach Amir Ghalenoei chuan tournament-a team ‘tihduhdah ber’ an nih thu a sawi.
Hetih lai hian White House-a World Cup taskforce executive director Andrew Giuliani-a chuan Iran-in Egypt nena an inkhelh hunah Iran an kal leh haw hun tur chungchangah ‘inbiakna a awm mek’ a ti.