Aizawl: Mizoram Tourism-ah bung thar kai pui thei tur, ‘Pluck & Pay’ (Lo la, lei rawh) Festival chu kumin September 23 atanga ni 25 chhung hian Khawzawl District chhunga Chawngtlai leh Tualte khuaah ropui taka hman a ni dawn.
He kutpui hman dan tur hi Thawhtanni chawhnu khan Tourism Minister office chamber, MINECO-ah Tourism Minister Lalnghinglova Hmar hovin sorkar hotu leh khawtlang aiawhte’n an sawi ho va. Minister Lalnghinglova Hmar chuan he kutpui kalhmang hi Mizoramah chuan thil thar leh phurawm tak a nih thu sawiin, sorkar chuan he ‘community-based tourism’ kaltlang hian sumdawn a tum loh thu leh a thlengtu khuaten an hlawkpui ber a duh thu a sawi.
Thutkhawha an rel danin, he ‘Lo la, lei rawh’ kutpui hawnna hi Tualte-ah neih a ni ang a, Chawngtlai-ah a kharna hun hman a ni thung ang.
He festival chhung hian mikhualte chuan a thlengtu khuaa lo leh huanah te kalin thlai leh theite chu mahni ngeia lovin an lei thei dawn a, thlai lawh mai bakah hian pipu uai, sairawkherh inperhsiak leh kalchhet kal te buatsaih a ni ang a, thlai leh thei zawrhna stall bakah a hawn zan leh tawp zanah te concert an buatsaih bawk ang.
He kutpui chanchin hi state chhung leh pawn thleng pha tura publicity kalpui vat nise an ti a, programme kimchang zawk chu Deputy Commissioner, Khawzawl District hovin Organising Committee-in an la rel chhunzawm leh dawn a ni.
Thutkhawmah hian Tourism leh Horticulture Department hotute, DC Khawzawl aiawhte, Chawngtlai leh Tualte Village Council President-te bakah Event Management Agency aiawhte an tel a ni.