IPR leh P&S Department Minister B. Lalchhanzova chuan a pisa-ah, Indiana, USA-a cheng mek Zo Sanga lehkhabu ziah, ‘Genre Hran (Nihphung Danglam)’ tih chu Thawhtanni khan a tlangzarh.
Lehkhabu tlangzarhtu chuan lehkhabu danglam tak tlangzarhtua a tang chu lawmawm a tih thu sawiin, ram pawna awm Mizoten an hnam puite rawn ngaihpawimawha kawng hrang hranga inzawmna an rawn siam thin chu hlu a tih thu a sawi a. “He lehkhabu hi America ram atanga Mizo lehkhabu mi mal ziah hmasa ber a ni a, a hming ang ngeiin a danglamin Mizo mipuite tan hlawkna tam tak chhar tur a awm a ni,” a ti.
Tlangzarh inkhawm hi Prof. RL Thanmawia, Mizo Academy of Letters (MAL) khaipa chuan a kaihruai a. Dr. H. Laldinmawia’n lehkhabu thlirlawkna (review) neiin, ‘Genre Hran’-ah hian phek 309 leh bung 91 zet a awm thu leh, bung tin mai chu chhiar nuam tawka tawi fel leh mi tin mil tura ziah a nih thu a sawi.
Lehkhabu ziaktu Zo Sanga hi kum 2000 vela USA-a chhuk thla kha a ni a. Tunah hian US Postal Service, Pennsylvania State University-ah a thawk mek a ni.