A film thar “Couture” tih lar nana hmun hrang hranga hun hmang mek Angelina Jolie chuan an kawmna pakhatah ngaihzawng lam reng reng a ngaihtuah tawh ngai loh thu a sawi.
Jolie sawi danin, Brad Pitt nen an inthen hnuah kum 10 a vei ve ta a, mahse hmangaihna lam a ngaihtuah tawh miah loh thu sawiin, a hna bakah a fateah a engkima engkim a pek thu a sawi bawk.
Kan inthenna pawh kum 10 a lo tling ve ta, hemi chhung hian ngaihzawng nei a, hmangaihna dang vuan ve turin min ngai a ni mai thei, mahse ka ngaihtuahnaah chutiang chu a awm eih lo. Zalen taka nuna, min tina leh tichhe thei thil dang laka ka rilru pek hi ka duh tawh rih lo, Jolie chuan a ti.
Tunah hian ka fate hi an nula tlangval chho ve tan a, nunkawng dik lo an zawh ka duh lo a, ka tleirawl lai nunte ka chhuikir a, harsatna lian tak tak an tawng ang tih ka hlauh avangin an tan hun tam zawk hman ka duh thin, a ti bawk.
Kum 2004 kuma Mr & Mrs Smith film an chan dun atanga inchhar leh inkawp zui ta Jolie leh Pitt te hian fa paruk neiin, an vai hian an nu bulah an awm vek a ni.
Angelina Jolie leh Brad Pitt te hi innei lem lova hun rei fe an chendun hnuah August 2014 khan inneiin, kum 2016 ah an inthen thung. An inthenna lehkha hi hun rei fe ngaihtuah a nih hnuin December 2024 khan tihfel a ni ta a ni.