France, Spain leh Europe khawthlang leh laili ram hrang hrangah khaw lum tur inralrinna (red heat alert) tihchhuah a ni a, tun kar chhungin 40°C-a lum pawh a ni thei dawn.
France-a ram bial zahve aia tam chu khaw lum inralrinna sang ber hnuaiah an awm mek a, sikul tam tak chawlh tura tih a ni a. Bordeaux-ah chuan Thawhtanni khan 42°C a kai tih khaw chin zirtu, Météo-France chuan a sawi.
France chhim lama Carpentras khuaah naupang kum hnih leh kum li mi chu an chhungkaw car-ah thiin an hmu a, khaw awm dan zir loh vanga ngaih a ni.
Red warning hi Germany, Italy, Switzerland leh Luxembourg-a thuneitute pawhin an lo tichhuak tawh bawk.
Khaw lum chhoh zel hi Sahara thlaler atanga hmar lama boruak lum tleh vang a ni a, hei hian a nghawng hmunte chungah a châm a, khaw chin zirtute chuan tun hnaia khaw lum rei ber zinga mi a nih theih thu an sawi.
Scientist-te chuan khaw lum uchuak tak lo thleng thin chu khawvel lum chhoh zelna chhinchhiahna a nih thu an sawi a, Météo-France chuan kum 1947 atanga France-ah khaw lum record 51 zinga 34 chu kum 2000 hnu lama mi leh 26 chu kum 2011 hnu lama mi a nih thu a sawi.
Spain-a sorkar weather service Aemet chuan Nilaini thleng hian tun nipui chhungin a lum uchuak hun tur a nih thu leh ‘a nih dan thin pangngai aia 5-10°C inkara a lum’ tur thu a sawi a, hmun thenkhatah chuan 44°C a kai tur thu an sawi a. Basque ram tan red alert tihchhuah a ni a, San Sebastian-a a lum lai berin 40°C a kai dawn niin an sawi.
Italy chuan khawpui 12-ah red alert a tichhuak a, heng zingah hian Milan, Turin, Venice, Bologna, Florence leh Rome te pawh an tel a, ni eng emaw zat chu 35°C aia lum a nih hnuah red alert a tichhuak a ni.
Kar tawp khan Germany-ah hian tui hleuhnaah mi panga an thi a, khaw lum hi 38°C a tling tawh.
UK-a Met Office chuan England leh Wales hmun thenkhatah chuan Nilaini leh Ninganiah red heat warning a tichhuak a, hmun thenkhatah chuan 38°C a tling thei dawn niin an sawi.
Greece laili, Akraifnio bula kangmei chhuak chu a thelhtuten an bei mek a, khaw lum, ro leh thli na tak tleh avangin motor kawngpui lian chu hun eng emaw chen khar a ngaih phah.
Belgium-a IRM meteorological institute chuan kar lehah a lum ber hun a thleng dawn tih an sawi a. Hetihlai hian ram chhunga rel operator chuan an lun vang laiin rel thenkhat chu khaw lum vangin Thawhtanni leh Thawhlehni khan an dintir rih tih an puang.