Mizo Zirlai Pawl (MZP) chuan nimin khan thuthar thehdarhtute kawmin, 2005 electoral roll-a awm lo, kum 2024 a rawn awm thar khua 97 a awm thu an sawi a, India leh Bangladesh khua leh tui nihna nei kawp an hmuhchhuah thu an sawi.
MZP ten ram leh hnam tana an hmalakna leh beihna hi a nep lo a, hun hmasa lam atang tawhin kan ram khalh ngiltu an nihna chen a awm bawk. Tuna dan lova khaw din ni ngei an rawn puangchhuak leh ta hi vei a hun a, ram pahnih khua leh tui nihna nei kawp an awm ngat phei hi chu muttui lohna tham a va ni em.
Heng dan dik lova thiltihna hmunte hi ramri hnaih zel a nih avangin tuna SIR kalpui mekah pawh hian fimkhur lehzual a ngai hle a, a titute hian ram leh hnam hmangaihna rilru an put phak loh phei chuan dan lova kan mi leh sa ni tura hui luh teuh theihna hun remchang a ni.
Chuvang chuan fimkhur a, sorkar hian dan lova khaw din leh khua leh tui dik taka a enfel that hi a tul hle a, tun atanga hnathawh tan nghal ngai a ni. Tin, ramri khua hnamdang lo pung chak ta lutuk leh a bik takin Chakmate pun chak em em dan an sawite hi a tak a nih chuan vei a hun a, hmalak vat vat ngai a va ni em.
SIR kalpui mekah hian a khawihtute an fir a, ECI lam pawhin heng ramri hnaih khuate hi a bik taka khawihtu tur emaw, tlawmngai pawlte emaw sawma hma an lak a ngai hle. MZP te thupuan chhuah hi a dik a nih ngai chuan harhchhuah nan hmang ila, sorkar vawiin atangin che nghal teh se.