Aizawl: Food, Civil Supplies & Consumer Affairs Minister B. Lalchhanzova’n Thawhlehni khan FCI Godown, New Champhaiah raltlante tana duan buhfai quintal 4,229 leh kg 5 a sem.
Buhfai semna pualna inkhawmah Minister B. Lalchhanzova chuan, raltlan nih chu ei leh in mai bakah chenna tur thleng pawha thil harsa leh hrehawm tak a nih tur thu a sawi a. Mipui hrehawmna chhawk zangkhai turin sorkarin ruahmanna a siam tih sawiin, ruahmantute leh thahnemngai taka telte chungah lawmthu a sawi.
Minister chuan raltlanten tanpuina dang tam tak an mamawh dawn tih sawiin, Mizo leh Kristian an nihna angin Champhai mipuite chu tlawmngaihna leh tanpui duhna thinlung pu a, theih ang anga raltlante thlamuan thin turin a chah a. Sorkar thil tih hrang hrang hi mipui tel lo chuan a hlawhtling thei lo tih sawiin, khawtlang hruaitute leh mipuite chu thawhpuina tha tak neihpui zel turin a sawm.
He chhawmdawlna ruahman tak hnuaiah hian khua leh veng hrang hrang 43-a raltlan mi 12,083-te chuan mi pakhatin buhfai kg 35 zel an chang thei dawn a ni.
Buhfai sem zawh hian Minister B. Lalchhanzova chuan a department chan hrang hrang — Revenue, Civil Supply, Information & Public Relations office bakah Legal Metrology office te a tlawh kual nghal a ni.