Chief Minister Lalduhoma chuan chief minister leh party president dinhmun chelh kawp chu tha a tih ngai loh thu sawiin, tun thlengin a dinna a la ngai reng tih a sawi.
Nilainia thuthar thehdarhtute a kawmnaah tun hnai Mizoram politics khawvela sawi hat kai — chief minister leh party president dinhmun chelh kawp chungchang te, minister-te portfolio siksawi leh sorkar hnathawh muang chungchangte zawhna a chhang.
Lalduhoma chuan chief minister leh party president nih kawp chu tha a tih ngai loh thu sawiin, tun thlengin a dinna a la ngai reng tih a sawi a. “Chief minister leh party president nih kawp loh hi kan party inkaihhruaina duan a nih lai pawha a rawttu ka ni a. Hemi chungchang hi mipui vantlang hmaah pawh keimah deuh hlirin ka sawi thin,” a ti.
President charge a lo chelh lailawk chhan sawi fiahin, party president (Lalliansawta) damlohna avanga a chawlh laiin vice president pakhat pawh damlohna vek avangin a chawl a, elected OB a nih angin amah chelh tura ruat a nih thu a sawi a. Tunah erawh president charge chu a chelhtu ngai, Lalliansawta kuta hlan let leh vek a ni tawh tih a sawi a. “Chief minister leh party president ka nih kawp hi Congress leh MNF party chuan an hlau hle a, ka ni kawp dawn lo. Ka dinna ngaiah ka la ding reng,” a ti.
Chief minister ni chunga works department chan chungchang sawi pawh, “Works department (PHE, PWD, Irrigation leh P&E) hi vawiin thleng hian ka la chang lo, ka dinnaah ka la ding reng,” a ti bawk.
Adviser to CM pakhatin, ‘ZPM sorkar kum chanveah hnathawh a muang’ tia a sawi chungchangah chief minister chuan, “Chu thahnemngaihna chu a dik a ni,” tiin a sawi a. Hna a muan chhan ber chu sorkar hmasa laka hun rei tak post ruak hnawh khah loha a lo awm tawh thin avangin leh, thawktu indaih lohna nasa tak a awm vang a nih thu a sawi fiah.
Minister-te hna chanpual (portfolio) siksawi chungchangah tun dinhmunah siksawi tumna a awm loh thu sawiin, “Sorkar dangah chuan minister hna chanpual an inchuh zawk thin laiin, keini chu kan inhnawn zawk thin,” a ti a. Heti chung hian tun thlengin portfolio hi vawi ruk vel chu an lo thlak danglam (adjust) tawh tih a sawi.
ZPM party dinhmun sawifiahin, chief minister chuan central-ah BJP kaihhruai National Democratic Alliance (NDA) an zawm loh thu a sawi a. Chakma Autonomous District Council (CADC)-ah BJP leh ZPM tangduna sorkar siam a ni pawh mi mal thutlukna ni lovin, party thutlukna leh remtihna vek a nih thuin a chhang a ni.