Chief Minister Lalduhoma chuan ‘Ease of doing business’ chungchang a sawi fiah a. Mipui hnen atangin Right to Public Service (RTPS) Act hmangin sorkar department hrang hrangin complaint an la dawng lo tih a sawi a. Mipui pawhin an chanvo dik tak an hriat a pawimawh thu a sawi.
Nilaini khan Conference Hall, CMO-ah thu thar thehdarhtute kawmin chief minister chuan sorkar department tih tur eng emaw zat a awm laiin mipuite hnen atangin RTPS Act hmanga complaint an la dawn loh thu a sawi a. “Kan thawk tha viau a tih theih rualin mipuite hian awareness kan tlakchham vang a ni ve thei a. Sorkar kan dawr a, rei tak tak chhanna awm loa a awm thin hi mipui lamin kan hriat a ngai a ni. Mipuite service pek kawngah hun bithliah a nih avangin kan chanvo hria ila, department lam pawhin mipuite mamawh thehluh chhan anih vat vatna turin tan lak a ngai,” a ti.
Mizoram sorkar hian sorkar laipui hmalakna, ‘Compliance Reduction and Deregulation Reforms Programme’ hnuaia dan leh hrai tul lo leh rit lutukte tih tlem a, kalphung tihawlsam te, inrintawnna thupuia hmanga rorelna kalpui te, leh sumdawnna lama hmasawnna (investment, entrepreneurship leh economic growth) tana environment tha siam tumna chu nasa takin a kalpui mek a. He hmalaknaah hian Commerce, industries, geology & mining department chu nodal department an nih thu a sawi bawk.
Lalduhoma chuan Deregulation Phase I (February–December, 2025) hnuaia thawhrimna avangin sorkar laipui hnuaia Department for Promotion of Industry & Internal Trade (DPIIT)-in ram pum huapa endikna a neihah Mizoram chu India state-te zingah 12-na hial a lo ni tawh a. Phase II hnuaiah hian state-a dan leh hrai hman mekte uluk taka thlirletna leh tihhmasawnna lam kalpui leh mek a ni a, priority area 23 Mizoram tana thlan chhuah zinga hmalakna panga — power sector, environment, tourism, health care leh education te chu India sorkarin a pawm tawh a, a dangte pawh chak taka kalpui mek a nih thu a sawi.
RTPS Act-in a huam sector hrang hrang 197-a zawhna leh hriat duh, rei tak chhan loha thang thinte awlsam zawka hriat zung zung a nih bakah complaint an thehluh zung zung theihna tur portal chu July, 2026 chhung hian siam zawh hman tum a ni a, heng zawhnate lo buaipui tur hian department tinah nodal officer ruat vek an ni tawh tih a sawi bawk.