Jamie Carragher chuan Andoni Iraola chu season tharah Premier League nomawi title chuh thei khawpa Liverpool chu a hruai thlen a ngai tiin a sawi.
2025-26 season tawpa Dutch coach Arne Slot bân a nih hnuah Iraola hi a thlaktu atana ruat a ni a, Anfield-ah kum hnih chhung atan contract a ziak a ni.
Spaniard coach hian season hmasaah khan Bournemouth chu parukna nihpuiin Europa League khel turin a tlinpui a, Champions League khel thei tura tling, Liverpool lakah point thum chiahin an hnufual a, hemi hnuah hian Liverpool hi a zawm ta a ni.
Liverpool tan chuan season hriat reng tlak loh a ni a, champion Arsenal lakah point 25 zetin an hnufual a, nomawi engmah an la lo va. Point 60 hmuh chu 2006-07-a Tottenham (point 60 bawkin pangana) hnuah Premier League-a pangana chin chung lama tling thei zinga point hmu tlem ber an la ni.
Carragher-a chuan Iraola hian a season hmasa berah Premier League nomawi chuh pha ngei turin hma a lak a ngai tih a sawi a, a bik takin nipui bazar inhawn laia an chet fuh a pawimawh tih a sawi bawk.
Liverpool defender hlui, Carragher chuan season tan hunah a club hlui chu coach thar hnuaiah Premier League nomawi chuh thei tur an nih thu hi a sawi chhuak.
“Nomawi an chuh pha ngei ang a. Ka khelh ve laia manager thar lo luh a, league-a champion tumna emaw, hnaih tumna emaw atana kum li emaw kum nga emaw chhung han nghah leh project lo neih thin hun kha chu a liam tawh,” a ti.
“Kha hun kha chu a liam tawh a, Slot a lo luh pawh khan chu chu ka sawi tawh kha. Jurgen Klopp-a team khan pathumna dinhmun an luah a, league nomawi kha in chuh ngei tur a ni tiin hma a lakpui a, an champion ta ngei bawk a ni,” a ti bawk.
A sawi zelnaah, “Iraola lakah pawh hian a hma ang bawk kha a ni. Liverpool chu season hmasaah khan pangana an ni a, a tha tawk lo hle. Chuvangin, season tharah Liverpool-in league an lak nghal erawh ka beisei bik lo; mahse, Liverpool kan ni tlat. Nipui bazarah hian pawisa thahnem tak kan hmang dawn a. Player tha tak tak tam tak kan nei a, nomawi kan chuh pha ngei tur a ni,” a ti a ni.