Floyd Mayweather Jr. chu boxing a chawlhsan hnua a chet velnaah exhibition hlawhtling tak tak leh sumdawnna hlawk tak takte avangin chanchin a nei zui nual a. Tunah erawh chuan boxing legend hian a mawi lo zawngin chanchin a nei mek a, court-a a inlan ngei a ngaih hmel hle.
Promoter CSI Sports chuan Mayweather-a hian Mike Tyson leh Manny Pacquiao te nena inhnek tura inremna siam a bawhchhia nia an hriat avangin zangnadawmna $ maktaduai 4.65 dilin an khing a ni.
“Kar kal ta Ninganiah khan Floyd Mayweather hi khin a ni a, promoter CSI hian Mike Tyson leh Manny Pacquiao te nena vawi hnih inhnek tura inremna avanga boxer hnena an lo pek lawk tawh $ maktaduai 4.65 chu dil let an tum a ni,” tiin The Ring chanchinbua thawk, Mike Coppinger chuan a sawi.
“CSI hian June 27-a Greece-a Mayweather leh Mike Zambidis te exhibition match khelh tur chu danna siam tumin hma an la bawk,” a ti.
He thubuai chhuahna ber hi CSI-in Mayweather telna exhibition event lian tham pahnih buatsaih tur hian exclusive rights an nei nia an sawi vang a ni a. A hmasa zawkah heavyweight champion hlui, Tyson-a nena inhnek tura tih a ni a, a khingpui hlun, Pacquiao nen pawh inhnek nawn leh tura ngaih a ni.
He inremna ziah a nih lai hian promoter chuan Mayweather hnenah $ maktaduai 4.65 chu a lo pe lawk tawh bawk a ni.
CSI chuan heng inremnate hi a la kal lai renga world champion hlui hian mi dang leh pawl dangte nen inremna dang siam tumin hma a la zui nia a hriat a. Chutiang zingah chuan Pacquiao nena inhnek tura ruahmanna dang leh Greek fighter Zambidis nena exhibition match khelh turte pawh a tel a ni.
Mayweather hian professional boxing hmunah hneh loh nei miah loin 50-0 record tha tak nen chawlh puang tawh mah se khawvel hmun hrang hrangah exhibition event-ah a la tel reng a, entu pawh a hip hneminhlawh pawh a la hnem zui viau a ni.