Aizawl traffic police te an tang zel a, lirthei veivak endik leh kawngkantute himna ngai pawimawha hma an la zel hi a lawmawmin, an thawhrimna a fakawm hle.
Hetih lai hian lirthei tlan dan phung pangngaia tlan lo leh man ngai an la awm leh thin hi a veiawm a, midangte tan hlauhawm an siam bawk.
Khawpui chhungah lirthei veivak a tam a, kawngpuiin min dawl meuh lo tih kan hre tlang theuh. Hetiang hi kan dinhmun a nih laiin rem leh rem lova midang kara inzep leh intlarna pela lo tlan duh talh an awm thin hi an ngeiawm hle.
A bik takin two wheeler taxi khalh leh hmeichhe ke hnih nei lirthei khalh ho hi an hlauhawm chang a tam a, midang tana hlauhawma khalh an ni tih an inhre lo fo thin. An vai chuan an ni hauh lo, mahse fimkhur lo zual deuh hi chu an awm a ni.
Hetianga midangte tana lirthei hlauhawm taka khalh hi hremna a awm a, man theih an ni tih hi inhre thar se la, kan lo hmanhmawh deuh a nih pawhin midang zai i ngai thin ang u.
Tin, kawngkan tute pawhin lirthei tlan tibuai lo zawnga a kanna hmunah tak kawngkan kan chin thar zel a tha hle. Chhun leh zan lamah traffic police ten theihtawp chhuahin lirthei tlan dan endik hna an thawk a, an thawhrimna hian rah tha chhuah zel se la, midangte tana hlauhawma lirthei khalhtute pawhin sim hlawm mawlh tawh teh se.