Aizawl: Health Minister Lalrinpuii chuan Inrinni khan Kolkata, West Bengal-a Mizoram Universal Health Care Scheme (MUHCS) empanelled hospital, Mizo damlo enkawl tamna, Natralaya RN Tagore Hospital leh Manipal Hospital te a tlawh.
RN Tagore Hospital hi lung leh kal thlakna tawnhriat nei tha niin Civil Hospital, Aizawla kal thlak kalpuina tura puitu an ni a. Tunah hian civil hospital doctor leh thawktuten training thawh khatna an nei zo tawh a, thawh hnihna neih leh tum mek a ni.
Health minister chuan damlo refer-te lo enkawl bakah Mizorama damdawi inten Mizoram sorkar damdawi in tihchangtlunna tura hmachhawp hrang hrangah thawhhona tam zawk neih a duh thu a sawi a, damdawi ina awm mek mizo damlote pawh harsatna an neih leh neih loh zawtin a kan nghal bawk a ni.
Damlo thi an awm pawhin death certificate pek chhuah muang deuh thin chu a rang thei anga pe chhuak turin damdawi in hotute a ngen nghal.
Manipal Hospital hi cancer-a super speciality hospital niin khawl thar tha nena thuam an nih avangin cancer enkawlnaah an rintlak thu an lo hrilh a. Minister hian ICU leh radiation wing te a tlawh bakah damlo inenkawl mekte pawh a kan nghal bawk.
Manipal Hospital hotute pawhin an damdawi in hrang hranga damlo an enkawl dan te, super speciality branch hrang hrang an neihte an lo hrilh a, damlote chu theihtawp chhuaha an lo enkawl thin thu sawiin chhunzawm zel an tum thu an sawi.
Minister chuan Mizorama nursing college-a campus recruitment neihpui atan a sawm nghal a, anni pawhin an damdawi in hrang hranga thawk turin Mizo nurse tam zawk an mamawh thu an lo sawi.
Lalrinpuii hi Dr Lily Chhakchhuak, Director, Directorate of Health Services, Zoremthara Ralte, Joint Resident Commissioner leh H. Lalhruaitluanga, PS to Minister-in an tawiawm.
Minister hian Inrinni vek khan Delhi a pan nghal a, Thawhtanni hian union health minister hova 16th Conference of the Central Council of Health & Family Welfare (CCHFW) meeting neih turah a tel dawn a ni.