Nimin khan Remna Ni vawi 40-na, Mizoram Peace Accord Ruby Jubilee pualin MLA ni mekte leh MLA lo ni tawhten kum 40 a upa Mizoram Peace Accord chungchang an sawi ho va, Lalfamkima, Deputy Speaker, Mizoram Legislative Assembly chuan he hun hi a hman pui a ni.
Zoram Research Foundation leh NCCI hnuaia India Peace Centre leh Aijal Club-te tang hovin Mizoram State Planning Board Meeting Room-a an buatsaih ‘40 Years of Harmony: Legislative Dialogue on Peace Building’ ah hian hun hman puitu Deputy Speaker Lalfamkima chuan thu sawiin, “Kan vawiin hun hlutna leh kan hun hman mek ropuina hre tur chuan Zofate hun kal tawh kan hriat a tul a ni,” a ti a.
Deputy Speaker chuan, “Remna kan neih hma, kum 1986 hmalamah kha chuan kan tlangram mawi tak hi silai puak ri thuai thuaite, nunau mangang au ri rawng rawngte, lungngaia tap leh rum riin a khat a ni. Chhungkuate then darh an ni a, khawlaiah ruang a let a, thihna leh rumna in ro a rel a, hmasawnna hnathawh a chawl thup a ni. Vawiinah erawh chuan kan fate chuan hlauhna nei lo vin sikul an kal a, sumdawngin hlauh tur nei lo vin sum a dawng a, hnathawktuin zalen takin hna a thawk a, Mizoram chuan ropui zawkin hmalam a pan mek a ni. Heng zawng zawng thlen tirtu inremna hi tihpalh thilthua lo thleng a ni lo va, inpekna thuk tak a anga lo thleng a ni,” a ti.
“Remna kan neih theihna atana thawktu kan hruaitu hnasate kan hre reng, Pu Rajiv Gandhi-a te, Pu Laldenga te, kohhran hruaitute, khawtlang hruaitute leh ram hruaitute chungah lawmthu kan sawi thar leh a ni. He remna hi a bul berah chuan engkima min hruaitu Pathian avang a ni a, he hun mi hruai thlengtu chu amah a ni, Pathian hnenah Mizoram remna avangin lawmthu kan sawi a ni,” a ti bawk.
Mizoram Peace Accord chungchang sawiin, “Mizo Accord hi khawvel hriatah pawh chhuanawm tham a ropui a ni. Peace Accord tam tak a hlawhchham tawh a, a hlawhchham mek a ni, Mizo Peace Accord erawh nghet takin a ding a, nghing thin mahse, a tlu lo, vawiin hi kan thleng ta anih hi. MLA te leh MLA hluite hian he remna hlu bik hi vawnghim turin mawhphurhna lian tak kan nei a, chu chu kan bik bo san a thiang lo. Tin, kan ram rorelna insang ber pawh hi remna a ngheh zual zelna tura hmun pawimawh lo ni zel rawh se. Buaina hmun leh indona kara awm mek zawng zawngte hnena hian mipuiin thinrimna aiah inhriatthiamna an thlanna hmunah remna a awm thin tih i kawhhmuh zel ang u,” a ti a ni.
He hunah hian MLA leh MLA hlui kalkhawmte chuan kum 40 liam ta a Mizoram Accord ziah anih atanga tun thlenga Mizorama remna leh muanna tluantling tak kan neih dante leh inremna ngialnghet kan neih avanga kum 40 chhunga kawng hrang hranga Mizoram dinhmun an sawi ho va. Remna boruak hnuaiah Mizoram than zelna tur leh hmasawnna tur kawngte sawi ho a ni bawk a. Sawihonaah hian Mizoram hual veltu state dangah buaina leh tharum thawhna ten nasa taka thla an zar reng laia kum 40 chhung nghet taka remna leh muanna kan vawnghim thei chu Mizote chhuanawmna ber zinga mi a ni thu leh Pathian awmpuina leh a remruatna a ni tihte tarlan a ni.
Kalkhawmte chuan remna leh muanna derthawn zia hriat reng a tul thu sawi hovin, mihringte chen honaah boruak engngemaw hlek avanga buaina leh tharum thawhna lian tak chhuak thei reng anih thute, Mizoram pawhin kan thenawm state dangte dinhmun thim leh rapthlak tak ang hi kan tawng ve thei reng tih hriat a tul ziate tarlan a ni a. Chumi avang chuan kum 40 chhung kan lo vawnhim tawh inremna hlu tak hi vawnghim a tungnung zel turin mipui aiawh tura thlan MLA te pawimawhna pawh sawi ho bawk.
Zoram Research Foundation-a Executive Committee Member Rev. Dr. Lalchungnungan sawi hona a kaihruai a. India Peace Centre Director Michael Angelious-a’n thupui a sawi a, India Peace Centre hi National Council of Churches in India (NCCI) hnuaia mi a ni a, NCCI campus, Nagpur-a hmunpui nei a ni. Zoram Research Foundation-a Executive Committee Member Rev. Dr. Vanlalchhuanawman sawi hona khaikhawmin hun a khar a ni.