Kan state-ah Special Intensive Revision (SIR) kalpui zawh niin, tunah hian thun leh paih dilna hun hawn chhoh a ni leh dawn a, he lai tak hi a pawimawh hun lai a ni.
Zep thu a cheng lo a, kan ramah ramdang mi nasa takin an lo lut a, thenkhat chu an awmna ram buai avanga lo tlan lut an ni. Heng mite hian dik tak sawi chuan cham hlen an duh ngei ang. He hun hi remchangah an la thei tlat a ni.
July ni 5 atanga August ni 4, 2026 chhung hi inthun luh belh leh paih theih hun atana hawn niin, hemi chhung hian dik leh felfai taka kalpui ni se la, a pawimawh hun lai tak, engkim a bu ang thlapa chet hun tur a nih avangin a buaipuitute pawh an fimkhur hle a ngai dawn.
Tlawmngai pawl hrang hrang intelkhawmte chuan nilaini khan thuchhuah neiin, vil an tum thu an sawi a, Mizoram khawtina member nei an nih hlawm avangin rahtha chhuah mawlh bawk teh se.
Tlawmngai pawl hrang hrangte thuchhuak hi khawtin leh vengtinah zawm ni thei se la, a thawktu leh khawihtute pawh mihring ve bawk an nih avangin vil a, enpui an ngai hle dawn tih a chiang a, chuvang chuan he siamthat hun chhung rei lote hi chu uluk taka kalpui a nih theih nan i tangrual teh ang u.