Katy Perry chuan a thawmhnaw hlui hrang hrangte lilam tanin, a thente chu a tleirawl chhuahtirh, stage a daikai tantirh laia mite a ni hlawm.
Kum 41 mi zaithiam hian ni 21 chhung awh tur sweepstakes nei tanin, a concert tawhna hrang hranga a thawmhnaw hakte a lilam a, heta tanga a sum hmuhte hi kum 2018 a an unaua an din Firework Foundation atan a hmang dawn a ni.
Hemi tih larna pakhat atan hian tun lai hian a zaina hmun hrang hrangah a thawmhnaw hluite hi hachhuak lehin, June 30 pawh khan Cardiff, Wales-a a zainaah a lilam tur zinga a kawr hlui pakhat chu rawn ha chhuak lehin, mipui lawm a hlawh lehzual hle.
Perry hian a u Angela Lerche nen Firework Foundation hi an din a ni a, naupang dinhmun harsa zawkte dawmkan leh chhawmdawl chu an hna a ni a, amah ngei pawhin a naupan laia a lo tawn tawh harsatna hrang hrangte chu naupangin an tawn ve loh nana din an nih thu sawiin, a kawng chu a tluang purh bik lo niin a sawi bawk.
A u Lerche hi he foundation-ah hian president niin, Katy duhthusam leh ani pawhin tih a chak tak chu an unaua an thawh thu leh nuam an tih thu a sawi a, naupangte harsatna leh an manganna lak ata chhanchhuah hi kan duhthusam a ni a, music lama Katy hlawhtlinna hi midang tan pawha malsawmna ni ve turin theihtawp kan chhuah dun zel dawn a ni, a ti.