Club Brugge winger Christos Tzolis la lut thei tur zingah Arsenal chu hmahruaitu an ni mek a, nipui bazarah hian Mikel Arteta chuan Greece international player hi a lak theih an ring.
Kum 24 mi hi season liam taah khan a che tha hle a, Belgian club tan vawi 52 khelhah goal 22 a khung a, a thiante thun tur vawi 29 a siamsak a, hei vang hian Europe-a club lian hrang hrangte ngaihven phah hle.
Arsenal hian Tzolis hi hun eng emaw chen an lo thlithlai tawh a, amah ngaihventu club dangte aiin an tan hian lak luh a beiseiawm zual a ni.
Greek journalist Dimitris Manakos chuan, “Tun hnaiah Belgium-a mi tam takin an hriat phak aiin Arsenal hian beiseina an nei sang tih ka hria. He club hi thlek thuak thuak chauh thin an ni lo. Arsenal hian hun eng emaw chen chu an lo zui tawh a, thla 12 liam ta chhunga a chet dan kha an duh hle a. Arsenal hian an bawhzui tak tak a nih chuan an hlawhtlin theih mai ka ring,” a ti.
Club Brugge hian Tzolis hi hralh an phal a, an hralh dawn a nih erawh chuan an club chanchina inhralhna man to ber atana hman an inbeisei a. An hralh chhuah tawh zinga man sang ber chu kum 2022-a AC Milan-a Charles De Ketelaere an hralhna € maktaduai 37.5 kha a la ni.
Thla kal taah khan Tzolis chuan a hma lam hun chungchang sawiin, thutlukna chu ama thu ni lovin Club Brugge thu thu a nih dawn thu a lo sawi tawh a ni.
“Ka awm zel dan tur chu Club Brugge chungah a innghat a, keima thutlukna siam tur a ni lo. Ka tana tha ber tur chu kan la hria ang chu. Club duh thlan ringawt a ni lo, ka tan eng nge tha ber ang tih kan inzawh pawh a ngai ang,” a ti.
Tzolis hi a hmain Norwich City-ah kum thum chhung a lo awm tawh a, vawi 30 a khelhah goal thum leh mi dang thun tur vawi hnih siamsak chauh a nei a. FC Twente leh Fortuna Düsseldorf-ah te loan-in a lo khel tawh bawk a ni.