Aizawl: Thawhlehni tuk khan MNF founder president, Mizo Hnam Pa u Laldenga thihcham vawi 36-na pualin a thlan, Treasury Square, Aizawlah MNF chuan an president, Zoramthanga hovin an hruaitu thahnem tak leh chhungkuain hun an hmang.
Laldenga thlanah hian zahna pangpar an dah a, sunna hun hman a ni bawk.
MNF president chuan, “Inremna hlawhtling ber leh ram zalen ber min hlawhchhuahpuitu, hnam hmangaihna chi Zofate thinlunga tuhtu, Pu Laldenga hi hriatreng a phu a. A thihcham a lo thlen hian zahna chibai kan buk nawn leh a ni,” a ti.
Hnam dangten Laldenga hova remna hlawhtling an nei thei chu an awt a, vannei an ti hle niin a sawi a. “Hetianga inremna tha kan nei thei hi ropui min tihpui a, sawi nuam an ti hle. Thangtharten zalenna kan neih hi kan vawnghim zel tur a ni,” a ti.
Chhungkaw aiawha thusawitu, Laldenga fanu, Dr. Reenee Lalrinzuali pawhin thu sawiin hnam tana nunna hlantu zawng zawngte zahna a hlan a, a pa thih cham puala hun hmangtu zawng zawngte chungah lawmthu a sawi bawk.
Lalruatkima, MNF Treasurer kaihruai hun hmanah hian Lalrammawia, party adviser-in hunserh a hmang a. K. Vanlalauva’n tawngtaiin kalkhawm a tin.