Indian Super League (ISL) season thar tan a ni a, hlut a hlawh nghal hle a. YouTube-ah a thlawna en theih niin a entu zinga 91% deuhthaw chuan mobile phone hmangin an en a. Hmeichhe entu pawh an thahnem hle a, 22% an tling a, kum 25-34 inkar chu 31.5% niin entu tamna ber an ni a, kum 13 leh 24 inkar 21% an tling bawk.
YouTube-in an tar lan dan chuan inkhel hmasa panga entu chu maktaduai 65 an tling a, ISL YouTube channel atanga thlirtu maktaduai 52 zet niin an channel subscribe thar 1,20,000 an awm phah bawk a, subscriber maktaduai 2.7 an nei tling ta chiah a ni.
Kar kal ta Nilainia Punjab FC leh Odisha FC inkhelh zawha an dinhmun lak khawm a nih hnuah inkhel entu chu maktaduai 75 chuang an nih bakah subscriber thar 1,36,000 chuangah an pung niin club thuneitu pakhat chuan a sawi.
Subscriber thar zinga 29,100 chu Thawhtanni tlaia NorthEast United leh Mohun Bagan Super Giant an inkhelh tuma mi an ni a, a tam ber a ni a. A dawtah chuan Inter Kashi leh Kerala Blasters inkhelhna atanga subscriber thar 26,700 awm kha a ni bawk a. Thawhtannia inkhel chu mi maktaduai 19.27 zetin an thlir a, thlirtu tam ber a ni.
Ningania ISL media thuchhuah tar lan dan chuan Bengaluru FC leh Sporting Club Delhi inkhel hmasa bera English commentary feed-ah entu 85,277 an awm a. Pathiannia Pune-a Kashi leh Kerala Blasters an inkhelh tumin 3,49,073-ah a pung a, he round-a entu tam ber a ni a. Inkhelte hi YouTube-ah English leh Hindi-in a en theih a ni.
Hetianga a hlawhtlin nghal em avang hian club te an lawm hle tura ngaih a ni a. YouTube atanga inkhel 163 intihsiakna atanga fakna hmanga sum hmuh atanga 55% chu club-te hnenah pek a ni dawn a, hei vang hian YouTube atanga thlirtu an tam poh leh club tan a tha dawn a ni.
Sony Liv-ah pawh ISL hi en theih a ni a; mahse, YouTube-a tihchhuah hi a phak chin en let nan leh tihpun dan tha tak pakhat a ni tiin FC Goa CEO Ravi Puskur chuan October 10-a intihsiakna tan hma khan a lo sawi tawh a. India-a live sports-a thil thar hmasa ber hi All India Football Federation (AIFF) President Kalyan Chaubey ngaihtuah chhuah a ni a. “A neitu zinga mi pakhat hnenah hma lak theih dan tur ngaihtuah turin a ti a ni,” tiin round hmasa ber inkhel paruk chungchang dinhmun petu official chuan a sawi.
“Club CEO thenkhat, AIFF official te leh club neitu pahnihte Delhi-ah an inhmu a. Chu an inhmuh khawm hnuah club neitu pakhat ngaihdan pawh lak a ni. Hemi an pawmpui hnuah hian YouTube India aiawhte chu video hmangin kan bia a ni,” tiin official chuan a sawi.
India-a football league sang ber, ISL Season 13-na an hmang mek a, title sponsor chu JSW MG Motor an ni.