Bangladesh-a refugee camp-ah lei minin hmeichhe naupangte zirna in a chhilhah zirlai pasarih leh zirtirtu an thi.
Nilaini chawhnu khan tuipui kam khawpui, Cox’s Bazar-a Islamic study center chu chirh leh leh hnawlin a chhilh a, mi zawn leh chhanchhuah hna thawh a ni a. Chhiatna thlen lai hian sikulah hian mi engzat nge awm tih hriat chian a la ni lo.
Pathianni atang khan fur ruah sur a tam hle a, Cox’s Bazar-ah hian mi tam tak thihna thlen lei min a awm nual tawh nia hriat a ni.
Khawvela raltlan awmna hmun lian berah hian Rohingya mi maktaduai khat chuang an cheng a, Myanmar-a sipaite beihna laka tlanchhia an ni.
Refugee Relief & Repatriation Commissioner Mohammed Mizanur Rahman-a chuan chhanchhuah hna thawktute chuan a chung di sikul chhilhtu chirh kar atangin mi 13 an la chhuak a, an zinga pariat chu an thi niin a sawi.
Tual chhung district officer Panna Akhter chuan BBC Bangla hnenah, “An zinga thenkhat chu kum sarih, kum riat, kum 11 emaw kum 12 mi an ni,” a ti.
Naupang dang pangate chu damdawi inah enkawl turin hruai an ni bawk.
Hemi hma hian thuneitute chuan Pathianni atang khan lei min vangin Rohingya raltlan pariat an thi tawh tih an sawi a, an zingah hian naupang panga an tel.
Kum 2017-a sipaite beihna avangin Myanmar-a hnam tlem zawk tam tak zinga mi, Rohingya mi sang tel an thi a, mi 7,00,000 chuang an thenawm, Bangladesh-ah an tlanchhia.
A tam zawk Muslim an ni a, Buddhist tamna rama Myanmar sorkar chuan khua leh tui nihna a pe lo.
Mi tam tak chuan Bangladesh-ah hian nunphung tha lo tak an tawk a, tlang chhip tak takah tarpaulin leh mau hmanga siam inah an cheng hlawm.
Ruah tam zawk a sur dawn nia sawi a ni a, thuneitute chuan lei min leh tui lian nasa a la awm thei tih a sawi lawk a, chhungkaw thenkhat hmun hima sawn chhuah an tum bawk.