Aizawl: MizoTaxi App-a in inziak lut taxi-te chu thla khat chhung, July 10 atanga August 10, 2026 thleng enchhinna atan tlan loh ni nei lovin ni tin tlan phalsak an nih dawn.
Aizawl Traffic SP C. Vanlalvena chuan Ningani khan thuchhuah siamin he ruahman hi Motor Vehicles Act, 1988 Section 115-in thuneihna min pek ang leh July 8, 2026-a Co-ordination Committee on Traffic Management (CCTM) meeting-in a rel ang leh mipuite mamawh phuhruk nan Mizoram State Transport Authority (STA) ruahman leh pawmpuina anga kal a ni tih a tar lang.
Enchhin hun chhung hian MizoTaxi App-a inziak lut taxi-te chu taxi tlan loh ni danin a huam lo vang a, ni tin an tlan thei ang a. Enchhinna neih chhunga inziak lut tharte pawh a huam lo ve nghal dawn bawk a ni.
Traffic SP chuan MizoTaxi App-a inziak lutte chu STA-in a pek MizoTaxi App sticker chu an taxi hma leh hnungah tar turin a hriattir nghal bawk.
Lirthei dang leh MizoTaxi App-a inziak lut lote chu Aizawla lirthei intlanchhawk dan tura December 12, 2025 hriattirna chhuah tawh angin an tlan chhunzawm vek tur a ni tih SP thuchhuah chuan a tar lang bawk.